Tollurinn tekið á annað hundrað ólöglegra vopna

Það sem af er þessu ári hafa tollverðir stöðvað innflutning á 126 munum sem flokkast undir ólögleg vopn.

Þar á meðal eru tveir rifflar, ein skammbyssa og 20 loftbyssur. Einnig hefur verið reynt að flytja inn 28 ólöglega hnífa, þar af 16 fjaðurhnífa, 21 stykki af handjárnum, piparúða og hnúajárn. Þá hafa einnig 133 leysibendar af ólöglegum styrk verið stöðvaðir.

Í tilkynningu frá tollinum er þess getið að stærsta sending ólöglegs vopnabúnaðar sem tollverðir haldlögðu á liðnu ári hafði að geyma nærri 200 grömm af sprengipúðri, á annan tug kast-og fjaðurhnífa, kylfur, handjárn og sveðja.

Sendingin var í gámi sem átti aðeins að innihalda búslóð. Lögreglan á höfuðborgarsvæðinu tók málið til meðferðar sem lauk með sektargreiðslu.