Þrettán milljónir króna renna til hjálparstarfs á Grikklandi

Rauði krossinn á Íslandi hefur ákveðið að veita 13 milljónir króna til að fjármagna áríðandi hjálparaðgerðir vegna neyðarástands á Grikklandi og svara með því kalli Alþjóðasambands Rauða krossins og Rauða hálfmánans.

Hjálparaðgerðirnar fela meðal annars í sér heilbrigðis- og mataraðstoð, dreifingu hreinlætispakka og aðstoð við að koma flóttafólki í samband við ættingja og ástvini.

Um 600 þúsund hafa flúið til Grikklands á árinu og hefur straumurinn aukist sérstaklega síðustu þrjá mánuði. Þannig hafa yfir 300 þúsund manns komið til eyjunnar Lesbos, þar af um þriðjungur í október síðastliðnum, en eyjan er aðeins um tveir ferkílómetrar að stærð.

Starfsfólk og sjálfboðaliðar gríska Rauða krossins hafa undanfarna mánuði komið hjálpargögnum til þeirra sem á þeim þurfa að halda en sökum gríðarlegs álags undanfarna mánuði er fjárhagslegt bolmagn gríska Rauða krossins takmarkað og þarfnast hann því fjárhags­aðstoðar frá öðrum landsfélögum.

Rauði krossinn á Íslandi sendi á dögunum, í fyrsta sinn á þessari öld, sendifulltrúa á vettvang til lands innan Evrópu þegar Páll Biering, dósent í geðhjúkrunarfræði, hélt til flóttamannabúða norska Rauða krossins við landamæri Makedóníu.

Auk þess að sinna þar sálfélagslegum stuðningi flóttafólks starfar hann við að þjálfa gríska sjálfboðaliða til þess að veita slíkan stuðning.