Strandveiðar lífgað upp á sjávarþorpin

Um 630 smábátar stunduðu strandveiðar við Ísland í sumar en veiðitímabilinu lauk í dag. Veiðarnar hafa lífgað upp á sjávarþorpin hringinn í kringum landið. Þannig fjórfaldaðist bátafjöldinn á Djúpavogi en höfnin þar hentar einkar vel til smábátaútgerðar. Dæmið þaðan sýnir vel hvaða áhrif lítil breyting á fiskveiðistjórnunarkerfinu getur haft fyrir einstök byggðarlög.

Það er reyndar orðið rólegt yfir bryggjunum á Djúpavogi, menn voru búnir með sameiginlegan strandveiðikvóta svæðisins þann 13. ágúst, en kerfið virkar þannig að kvótinn klárast yfirleitt á flestum svæðum fyrir miðjan hvern mánuð þá fjóra mánuði sem strandveiðarnar eru leyfðar.

„Strandveiðin hefur komið afskaplega vel út hérna og verið heilmikið líf í höfninni,“ segir Andrés Skúlason, oddviti Djúpavogs, í viðtali í fréttum Stöðvar 2. Þar var reyndar sýnt þegar verið var að landa úr bát sem veiðir samkvæmt aflamarki en þeir voru tiltölulega fáir orðnir eftir á hverjum stað áður en strandveiðar voru teknar upp fyrir sex árum.

Andrés segir að fyrir tíma strandveiðinnar hafi fjöldi báta sem landaði yfir sumartímann verið komin niður í fimm til sex. 

„Núna eru allt að tuttugu bátar að landa hérna og það er heilmikið líf í kringum höfnina, eins og á að vera í svona sjávarþorpum. Þarna er hjartað í hverri byggð og þetta er það sem gefur þessu gildi.“