Kvótahafar halda áfram að senda kaldar kveðjur

Oddviti Djúpavogs segir að meðan Alþingi breyti ekki leikreglunum muni handhafar fiskveiðikvótans halda áfram að senda kaldar kveðjur inn í byggðarlög með því að yfirgefa þau fyrirvaralaust. Djúpivogur er eitt af þeim samfélögum þar sem fiskveiðistjórnunarkerfið hefur haft örlagaríkar breytingar í för með sér, og það aftur og aftur.

Þess er skemmst að minnast þegar forsvarsmenn Vísis tilkynntu í fyrra að fiskvinnslu yrði hætt á Djúpavogi og fimmtíu störf flutt til Grindavíkur. Heimamenn hafa reyndar náð að spyrna við fæti með byggðakvóta sem fyrirtækið Búlandstindur vinnur á staðnum, eins og fram kom í fréttum Stöðvar 2 í fyrrakvöld.

Andrés Skúlason, oddviti Djúpavogshrepps, segir að baráttan sé ekki búin.

„Við viljum meina það að við eigum rétt á því að fá eftir sem áður aðgang að þessari auðlind vegna þess að þetta sjávarþorp, - það á mikið undir því að við getum haldið áfram hér uppi stöðugri vinnslu og veitt atvinnu áfram í kringum þetta dæmi. Við misstum þarna 90 prósent af aflaheimildum af staðnum og það er auðvitað mikið högg,“ segir Andrés.

Djúpivogur átti einnig hlutdeild í síld og loðnu og þar var rekin bræðsla þar til fyrir ellefu árum.

„Á einni nóttu yfirgáfu menn, - S-hópurinn frægi yfirgaf svæðið hér með einhver 30 þúsund tonn af uppsjávarheimildum þegar sveitarfélagið var nýbúið að byggja höfn fyrir þessa aðila. Þannig að kveðjurnar hafa nú verið býsna kaldar á stundum.“

Oddvitinn spáir því að menn eigi eftir að sjá fleiri slík dæmi meðan kvótakerfið  er óbreytt.

„Þessir aðilar spila eftir þeim leikreglum sem Alþingi setur þeim. Og meðan þessum leikreglum er ekki breytt þá munu menn halda áfram að hegða sér með þessum hætti og þjappa saman aflaheimildunum og telja fólki trú um að hagkvæmnin sé alltaf fólgin í stærðinni.“