Heimsmeistaramótið í jójói verður haldið í Hörpu með pomp og prakt

Heimsmeistarakeppnin í jójói verður haldin í Reykjavík árið 2017. Tveir áhugamenn um jójóiðkun hafa tryggt sér þátttökuréttinn og segja jójóheiminn einstakan.

Vonast til að sjá uppúr 300 manns

Mótið verður haldið í Hörpu aðra helgina í ágúst á þarnæsta ári. Um árlegt mót er að ræða, sem haldið er til skiptis í Bandaríkjunum, Evrópu og Asíu.

„Ástæðan fyrir þessum mikla fyrirvara er bara þannig að við höfum tíma til að undirbúa allt,“ segir Sigurhans Óskar Sigurhansson, annar skipuleggjenda. „Við fengum mótið fram yfir Pólland, pólskur vinur okkur lét þau orð falla á Evrópumótinu í byrjun árs að hann myndi vilja fá mótið.“

Sigurhans segir erfitt að segja til um hversu margir muni mæta á mótið erlendir frá en vonast til þess að sjá uppúr 300 manns, þar af um 200 keppendur. Mótið er haldið yfir þrjá daga og hefst á forkeppni þar sem hver keppandi hefur mínútu til að leika listir sínar á sviðinu fyrir úrvalslið dómara.

Bandaríkjamaðurinn Zach Gormley er ríkjandi heimsmeistari í jójói. Hér má sjá hann leika listir sínar á heimsmeistaramótinu sem fram fór í Tókýó í ár.

„Svo koma undanúrslit og svo úrslit,“  útskýrir Sigurhans. „Það er keppt í fimm mismunandi stílum. Þú getur verið með eitt eða tvö jójó, eða jójó sem er ekki tengt, svokallað „off-string“ jójó.“

Gæti beðið heimsmeistarann um byrjandatrix

Sigurhans skipuleggur mótið ásamt félaga sínum, Páli Valdimar Guðmundssyni Kolka, en þeir hafa báðir keppt á jójómótum erlendis og hreppti Páll til að mynda fjórða sætið á Evrópumeistaramótinu í Búdapest árið 2013. Þeir félagarnir gera þó ekki ráð fyrir því að keppa um heimsmeistaratitilinn á heimavelli, enda munu þeir hafa í nægu að snúast þegar þar að kemur.

„Við erum samt að vinna í því að hafa einhverskonar Íslandsmeistaramót samhliða heimsmeistaramótinu,“ segir Sigurhans. „Að sjálfsögðu getur svo hver sem er komið og fylgst með úti í Hörpu. Jójó-heimurinn er þannig að þetta er svo opið fólk, ég gæti sjálfur beðið heimsmeistarann um að sýna mér byrjandatrix og hann myndi gera það.“

Páll Valdimar tók þátt í Ísland Got Talent í fyrra. Hér fyrir neðan má sjá hann sýna fimni sína með jójóið.