Vill viðræður við ráðuneyti um stofnun undirbúningsfélags um gerð flugvallar í Hvassahrauni

Dagur B. Eggertsson borgarstjóri hefur óskað eftir viðræðum við innanríkisráðuneytið á grundvelli gagna og tillagna Rögnu-nefndarinnar. Segir hann þessar viðræður taka til stofnunar undirbúningsfélags um gerð flugvallar í Hvassahrauni og hvernig rekstraröryggi verði tryggt á Reykjavíkurflugvelli á meðan unnið er að undirbúningi og gerðs nýs flugvallar.

Dagur hefur óskað eftir þessum fundi með bréfi til innanríkisráðherra en bréfið var lagt fyrir fund borgarráðs í morgun.

Hann segist jafnframt hafa áréttað í bréfinu samningsbundnar skyldur ríkisins til að loka þriðju flugbrautinni á Reykjavíkurflugvelli í samræmi við samninga Reykjavíkurborgar og innanríkisráðuneytisins.

Hann segir áhættumati og öryggisúttekt Isavia um þessa lokun hafa verð unna að beiðni ráðherra og er henni nú lokið með staðfestingu Samgöngustofu.

Borgarstjórinn segir á Facebook ljóst að Reykjavíkurborg geti skapað sér skaðabótaskyldu gagnvart uppbyggingaraðilum ef borgin kallar ekki eftir efndum á þessum samningsskuldbindingum ríkisins.

„Það væri í mínum huga óásættanlegt með öllu að borgarbúar þyrftu að borga einhvers konar bætur vegna vanefnda ríkisins. Ég tek fram að ég hef alla tíð gengið út frá því að ríkið virði þessa samninga, enda sú regla að samningar standi einn af hornsteinum samfélagsins. Engum er það betur ljóst en sjálfu dómsmálaráðuneytinu.“

Í tilefni af þessari frétt get ég upplýst að ég hef með bréfi til innanríkisráðherra óskað eftir viðræðum við ráðuneytið...

Posted by Dagur B. Eggertsson on Thursday, July 16, 2015