Formaður mannréttindasamtaka svartra Bandaríkjamanna þóttist vera svört

Rachel Dolezal, fyrrum formaður NAACP í Spokane Washington sagði af sér í gær. Dolezal hefur vakið heimsathygli eftir að í ljós kom að hún hafði dulbúið sig sem svarta konu og sinnti formennsku í samtökunum undir fölskum formerkjum.

NAACP eru bandarísk samtök sem beita sér gegn kynþáttamisrétti, þau elstu og fjölmennustu í Bandaríkjunum stofnuð árið 1909.

Samkvæmt foreldrum Dolezal sem er 37 ára gömul í dag hóf hún að samsama sig meira með samfélagi þeldökkra árið 2007. Fjögur systkina hennar eru ættleidd og þeldökk.

Hefur ekki útskýrt ástæðu dulargervisins

Afsögn Dolezal gerði lítið til þess að lægja öldurnar í kringum hana en í afsagnarbréfinu fólst hvorki útskýring á athæfi hennar né afsökunarbeiðni.

„Verið viss um það að ég mun aldrei hætta að berjast fyrir mannréttindum og ég mun gera allt sem ég get til þess að hjálpa og aðstoða, hvort sem það er í því að rísa upp eða stíga niður, því að þetta snýst ekki um mig. Þetta snýst um réttlæti,“ skrifaði hún í tilkynningunni sem birtist á Facebook-síðu NAACP í Spokane.

Formaður landskrifstofu NAACP, Cornell William Brooks, segir þá meðlimi samtakanna sem litu upp til hennar og voru þakklátir fyrir hennar leiðsögn hafa orðið fyrir miklum vonbrigðum. „Þetta truflar vinnu þeirra.“

Raunveruleikarof og órökrétt hugsun

Fjölskylda Dolezal skildu engan veginn hvers vegna hún ákvað að þykjast vera af öðrum kynþætti en hún raunverulega er.

„Ég held að þetta sýni bæði rof frá raunveruleikanum og órökrétta hugsun,“ sagði Ruthanne Dolezal, móðir hennar, í samtali við CNN. Larry Dolezal, faðir hennar, var sammála þessu. „Margt af því sem hún hefur gert er ekki rökrétt og andlega heilbrigð manneskja myndi ekki nálgast hlutina með sama hætti og hún hefur gert,“ sagði hann.

Einn bræðra Rachel hefur tjáð sig um athæfi systur sinnar og segir hann það móðgun. Hún tók hann tali fyrir um þremur árum og bað hann að segja engum frá leyndarmáli sínu þegar hann kom og heimsótti hana í Spokane. Þá var hún strax orðin stórt andlit í samfélagi svartra í borginni.  

„Hún sagði að hún væri að hefja nýtt líf og að manneskja þar ætlaði að verða svartur faðir hennar,“ útskýrði Ezra Dolezal, bróðir Rachel. Hann segist telja að hún sé að gera þetta af þörf fyrir athygli. „Ég held hún eigi í vandræðum með heilindi.“

Rachel laug því í viðtali fyrr á árinu að faðir hennar væri svartur maður sem hafi neyðst til þess að flýja vegna átaka við hvítan lögreglumann. Viðtalið má heyra hér að neðan