Félagsmenn ósáttir við aflýsingu verkfalls

Starfsmannafélag Kópavogs hefur aflýst fyrirhuguðum verkfallsaðgerðum sem hefjast áttu næstkomandi þriðjudag. Stjórnarfundur verður haldinn síðar í dag og annar fundur með trúnaðarmönnum í fyrramálið þar sem málið verður rætt. Ekki er ljóst hvort verkfalli sé alfarið aflýst eða hvort um frestun sé að ræða en formaður SFK vildi ekki tjá sig um málið þegar eftir því var leitað.

Jófríður Hanna Sigfúsdóttur, formaður félagsins, sagði að greint yrði frá ástæðum frestunarinnar eftir fund með trúnaðarmönnum á morgun.  Félagsfundur verður haldinn 13.október næstkomandi en efni fundarins vildi hún ekki tjá sig um. Hvort boðað verði til nýrrar atkvæðagreiðslu um verkfallsaðgerðir er því ekki ljóst.

Félagsmenn SFK sem fréttastofa hefur rætt við í dag eru ósáttir við stöðu mála og upplýsingaleysi af hálfu félagsins. Þá hafa töluverðar umræður spunnist á Facebook síðu félagsins þar sem félagsmenn lýsa óánægju sinni.

Kjaradeilunni var vísað til ríkissáttasemjara í júlí síðastliðnum. Þá höfðu öll önnur bæjarstarfsmannafélög innan BSRB undirritað og samþykkt framlengingu á kjarasamningum en á það féllust félagsmenn SFK ekki. 

Jófríður sagði í samtali við Vísi í lok september að félagsmenn væru verulega óánægðir með laun sín og að „kraumandi óánægja“ ríkti undir niðri. Engin lausn væri í sjónmáli og að bærinn færi í lamasess kæmi til verkfalls. Tæplega 90 prósent félagsmanna samþykktu verkfallsaðgerðir dagana 14., 15., 21. og 22. október næstkomandi og allsherjarverkfall 1. nóvember. Af 710 manna úrtaki kusu 446 félagsmenn.

Innlegg frá Starfsmannafélag Kópavogs - SfK.