Frelsissvipting á jólanótt: Áfram í gæsluvarðhaldi

Hæstiréttur staðfesti í dag gæsluvarðhaldsúrskurð Héraðsdóms Reykjavíkur yfir karlmanni sem dæmdur var í sex ára fangelsi í héraði í maí fyrir líkamsárás á hendur barnsmóður sinni og fyrrverandi unnustu á jólanótt. Maðurinn áfrýjaði dómnum til Hæstaréttar en hefur setið óslitið í gæsluvarðhaldi frá því frá því hann var handtekinn í íbúð konunnar í Mosfellsbæ. Maðurinn verður í gæsluvarðhaldi þar til dómur fellur í Hæstarétti en þó ekki lengur en til 30. janúar.

Maðurinn, sem er íslenskur en var búsettur í Noregi, hélt konunni og tveggja ára gamalli dóttur þeirra, nauðugri í íbúð hennar frá miðnætti á aðfangadagskvöld og þar til henni tókst að flýja um klukkan sex um morguninn. Sérsveit lögreglu var kölluð út til að yfirbuga manninn en hann hafði bæði hótað konunni og barninu, sem enn var í íbúðinni, lífláti.

Konan, sem er rétt rúmlega tvítug, hafði boðið manninum að verja jólunum með þeim mæðgum þar sem hann átti fáa að hér á landi. Þau höfðu hætt saman tæpu ári fyrr eftir þriggja ára samband. Maðurinn var kominn í samband með annarri konu sem henti honum út á aðfangadagskvöld. Þá hringdi hann í konuna sem bauð honum í heimsókn sem fyrr segir. Maðurinn byrjaði strax að tala illa um nýjan kærasta barnsmóður sinnar. Þegar konan tók ekki undir með honum réðst maðurinn á hana.

Hélt hníf að hálsi hennar

Í gæsluvarðhaldsúrskurðinum kemur fram að maðurinn hafi beitt barnsmóður sína ofbeldi og meðal annars rispað hana með hnífi á meðan á frelsissviptingunni stóð. Tók hann símann af konunni svo hún gæti ekki hringt eftir aðstoð. Þá hafi hann þröngvað henni til samræðis og kynferðismaka í eldhúsi íbúðarinnar. Fyrst hafi hann þröngvað konunni til munnmaka með því að hóta að skera hana á háls. Þvínæst hafi hann rifið nærbuxur hennar og þröngvað konunni til samræðis með því að halda hnífi að hálsi hennar.

Talið er að það muni valda ótta og hneyklsun í samfélaginu og særa réttarvitund almennings ef maðurinn gengur laus á meðan beðið er eftir því að Hæstiréttur taki áfrýjun hans fyrir. Áfrýjunarstefna var gefin út 23. júní, frumgögn málsins eru komin til ríkissaksóknara og verður ágrip tilbúið fljótlega. Ekki er talið um óeðlilegan drátt á málinu að ræða að því er segir í gæsluvarðhaldsúrskurðinum.

Maðurinn verður áfram í gæsluvarðhaldi þar til dómur fellur í Hæstarétti en þó ekki lengur en til fimmtudagsins 30. janúar.

Dóm Hæstaréttar má lesa hér.