Leita á leiða til að fjölga leikskólakennurum

Samband íslenskra sveitarfélaga sendi í byrjun mánaðarins framkvæmdastjórum sveitarfélaga bréf þar sem þau eru hvött til að leita leiða svo fjölga megi leikskólakennurum í leikskólum landsins.

Félag leikskólakennara og Félag stjórnenda leikskóla fagna þessari áherslu og vonast til þess að sveitarfélög fari í markvissar aðgerðir til að svo megi verða. Þetta kemur fram í ályktun fundar félaganna frá 11. þessa mánaðar.

Í hvatningarbréfinu frá Sambandi íslenskra sveitarfélaga er bent á þá staðreynd að einungis þriðjungur starfsfólks á leikskólum hafi leikskólakennaramenntun.

„Og miðað við aðsókn í leikskólakennaranám undanfarin ár mun ekki takast að uppfylla lagaskyldur stjórnvalda, um að tveir þriðju hlutar starfsmanna leikskóla séu með leikskólakennaramenntun, á þessari öld,“ segir í upphafsorðum bréfsins.

Bent er á að leikskólastigið sé eina skólastigið á Íslandi sem líði fyrir skort á kennurum. „En úr því má bæta meðal annars með því að nýta fjölbreyttan bakgrunn leiðbeinenda og skapa þeim aukna möguleika til að mennta sig til starfa á leikskólum,“ segir í bréfi Sambandsins.