Skoðar sérstaklega hitamál líðandi stundar

Ríkisendurskoðun mun sérstaklega taka fyrir nokkur málefni sem hafa verið hitamál í opinberri umræðu hérlendis á undanförnum mánuðum og vinna stjórnsýsluúttektir er þau varða á næsta ári.

Ríkisendurskoðun birti í gær áætlun um stjórnsýsluúttektir ársins 2015, en þar eru sérstaklega listuð upp 13 fyrirhuguð verkefni.

Við fyrirspurn Fréttablaðsins segir Sveinn Arason ríkisendurskoðandi að verkefnaval stjórnsýslusviðs sé meðal annars byggt á áhættumati, eða að reynt sé að meta hvar mest hætta er á að starfsemi ríkisins sé ekki eins hagkvæm, skilvirk og árangursrík og hún gæti verið. Þetta mat fari fram þriðja hvert ár. „Jafnframt er lögð áhersla á að taka á þeim málum sem ofarlega eru á baugi í samfélagsumræðunni hverju sinni og tengjast opinberri stefnumótun, hagkvæmni, skilvirkni og árangri í ríkisrekstri.

Þessi þáttur í starfseminni flokkast undir svokallað samtímaeftirlit. Dæmi um þetta eru m.a. úttektir á málefnum útlendinga/innflytjenda, stöðu barnaverndarmála og flutningi ríkisstofnana,“ segir Sveinn við spurningunni hvort hitamál líðandi stundar hafi áhrif á verkefnavalið.

Stjórnsýslusvið Ríkisendurskoðunar lauk samtals 30 opinberum skýrslum árið 2014 sem er metfjöldi á einu ári. Í þessum skýrslum eru settar fram fjölmargar ábendingar til stjórnvalda og stofnana um úrbætur.