Stórstjarna og búddamunkur í óvenjulegri hálendisverslun

Þótt maður gleymi einhverju heima í fjallaferð í Landmannalaugar, eins og mat, kolum eða jafnvel svefnpoka, þarf ekki að örvænta því þá bjargar maður sér bara í litlu sveitabúðinni sem rekin er í rútu á staðnum. Bræðurnir Eiríkur og Óttar Haraldssynir, standa vaktina í búðinni, sem nú er fjölskyldufyrirtæki.

Verslunin er aðeins eldri en verslunarstjórinn Eiríkur og allt hófst þetta fyrir rúmum 20 árum þegar Veiðifélag Landmannaafréttar réði fólk til að grisja vötnin á svæðinu.

„Þau sáu pening í því að fara hingað á tjaldstæðið og selja fólki fiskiflök en það var eftirspurn eftir fleiru en fiski,“ segir Eiríkur. „Fólk þurfti kartöflur, prímusa og alls konar dót svo þau juku við vöruúrvalið. Svo þegar veiðin hætti að vera sjálfbær voru þau áður en þau vissu af komin með búð í gömlum Land Rover jeppa hérna uppi á fjalli. Svo vatt þetta smám saman upp á sig og nú er þetta komið í rútu.“

Hjónin Jean Louis og Ruth Balladore, frá Frakklandi og Sviss, sögðust í spjalli við blaðamann aldrei áður hafa séð verslun í farartæki. „Þetta er frábært og kemur manni heldur betur í gott skap,“ segir Ruth.

Þau hjón fengu sér meðal annars samloku og kaffi, en það eru einmitt vinsælustu vörurnar í búðinni.

Sumir eru hissa að finna verslun á hálendinu og hún hefur birst í erlendum ferðabókum. Aðspurðir segja bræðurnar suma viðskiptavini eftirminnilegri en aðra.

„Hingað kom einu sinni búddamunkur, sem mér fannst skera sig úr og svo átti Emma Watson einu sinni leið hér um,“ segir Eiríkur en Óttar bætir glottandi við að Eiríkur hafi nú ekki kveikt strax á perunni og þekkt hana. Fljótlega kveðjum við þá bræður eftir skemmtilegt spjall og þótt hvorki munkar né stórstjörnur hafi komið við þennan daginn virtust margir fegnir að fá kaffisopann sinn, enda bragðast flest best á fjöllum.

Umfjöllun Stöðvar 2 um verslunina hefst eftir 14:45 mín hér.