Yfir 500 prósenta fjölgun í erlendum gestum á Eistnaflugi

Von er á allt tvö þúsund gestum á tónlistarhátíðina Eistnaflug sem hefst í Neskaupstað í kvöld. Rúmlega fjörutíu hljómsveitir koma fram. Þetta er í tíunda skipti sem hátíðin er haldin en boðið verður upp á fjölbreytta dagskrá. Hátíðin hefst í Egilsbúð í kvöld en þar koma fram meðal annars Skálmöld og Brain Police.

Stefán Magnússon, skipuleggjandi hátíðarinnar, á von á 1700 gestum en aðeins örfáir miðar eru eftir. Hann segir mætinguna undanfarin ár hafa verið mjög góða, a.m.k. síðustu þrjú árin eða eftir að hátíðin komst inn á fjölmiðlakortið. Mikil aukning sé í fjölda erlendra gesta í ár.

„Það er fullt af erlendum gestum og rosalega aukning. Í fyrra voru kannski þrjátíu erlendir gestir. Í ár eru þeir í kringum 200 sem við vitum um,“ segir Stefán. Svarar það til rúmlega 500 prósenta fjölgunar á milli ára. En kemst allt þetta fólk fyrir í Neskaupstað?

„Nei, ég get ekki sagt það. En það hjálpast bara allir að. Hver einasta dýna er notuð, öll heimahús og öll gisting sem er í boði.“

Sala á miðum er enn í boði eins og lesa má um nánar hér að neðan.

Páll Björgvin Guðmundsson, bæjarstjóri í Fjarðabyggð, segir mikla stemmningu fyrir hátíðinni.

„Stemmningin er góð. Það er gaman að því hvað Stefán er að fá flott bönd hingað ár eftir ár. Metnaðarfull músík þótt sumt af þessu sé mjög þungt en hann er líka með það sem höfðar til margra,“ segir Páll. Nefnir hann til sögunnar Skálmöld og Retro Stefson auk þess sem boðið er upp á barna- og unglingatónleika.

Þá nefnir hann að bæjarhátíðir fari fram í fimm af þeim sex fjörðum sem eru undir hatti Fjarðabyggðar sem hljóti að vera einstakt.

„Það er gaman að segja frá því að hingað til hefur þetta gengið rosalega vel. Íbúar taka mikinn þátt í þessu og gestir ganga mjög vel um. Gott andrúmsloft þessa helgi,“ segir Páll Björgvin um hátíðina sem fór fyrst fram árið 2004. Íbúar keyri rokkarana til og frá og allir séu með.

Post by Eistnaflug.