Bangsar elta börnin á leikskólana

Alþjóðlegi bangsadagurinn er í dag en hann er haldinn árlega þann 27. október. Á flestum ef ekki öllum leikskólum landsins mæta börnin með bangsa eða önnur tuskudýr í tilefni dagsins. Einhverjir foreldrar vöknuðu vafalítið upp við vondan draum í morgun þegar þeir áttuðu sig á því að bangsi barnsins hefði gleymst heima.

Hvetur Vísir lesendur til að senda stemningsmyndir frá deginum á ritstjorn@visir.is.

Dagsetningin 27. október kemur til vegna þess að þann dag árið 1858 fæddist Theodore Roosevelt, 26. forseti Bandaríkjanna.

Enska heitið á böngsum, teddy bears, kemur til af frægri veiðiferð sem forsetinn fór í árið 1902 í Mississippi. Þá neitaði Roosevelt að skjóta svartan björn sem átti sér einskis von.

Teiknimyndasöguhöfundur gerði í kjölfarið mynd af forsetanum með björn. Leikfangagerðarmaður greip boltann á lofti og skírði bangsana „teddy bears“ eftir forsetanum. Húnar voru reglulega notaðir í pólitískum skopmyndum sem tengdust forsetanum en Roosevelt kunni illa við gælunafnið „Teddy“.