Kröfu um ógildi kosninga í Rangárþingi ytra hafnað

Sýslumanninum á Hvolsvelli barst í síðasta mánuði kæra í kjölfar sveitarstjórnarkosninga í Rangárþingi ytra sem snýr að lögheimilisskráningu Ágústs Sigurðssonar, oddvita Sjálfstæðismanna og nýkjörins sveitarstjóra.

Farið var fram á ógildingu úrslita kosninganna í ljósi þess að Ágúst er með skráð lögheimili í Kirkjubæ í Rangárþingi ytra en er sagður hafa fasta búsetu á Hvolsvelli í Rangárþingi eystra. Kærunefnd hafnaði kröfunni.

Aðalheimilið á Kirkjubæ

„Þetta er nú í rauninni á misskilningi byggt,“ segir Ágúst, sem er fráfarandi rektor Landbúnaðarháskóla Íslands. „Við erum með tvöfalda búsetu. Við eigum bú á Kirkjubæ, sem við rekum, en eigum einnig annað hús á Hvolsvelli.“

Hann segir aðalheimili fjölskyldunnar vera á Kirkjubæ, þar sem hann hefur alla ævi átt lögheimili. Hann segist hafa útskýrt þetta á fundum með sveitarstjórn Rangárþings ytra en á fundi þann 9. júlí færði Á-listinn, sem er í minnihluta, eftirfarandi til bókar: „Ljóst er að föst búseta sveitarstjórnarfulltrúa, sem kæran fjallar um, er utan sveitarfélagsins og vilja fulltrúar Á-lista benda á 2. gr. siðareglna kjörinna fulltrúa og annarra stjórnenda Rangárþings ytra varðandi þetta mál.“

Ágúst segir kæruna og viðbrögð minnihlutans í kjölfar kosninganna hafa komið sér á óvart.

„Ég átti ekki von á þessu,“ segir hann. „Það er einhvern veginn svo fast í hausnum á mér að okkar aðalheimili er í Kirkjubæ, eins og alltaf hefur verið. Ég áttaði mig ekki á því að menn væru að velta þessu fyrir sér, en þetta er bara hluti af lýðræðinu. Menn eiga þennan kærurétt.

Telur farsælt samstarf framundan

Ágúst segist sjálfur aldrei hafa fengið kæruna í hendur. Hann telur ekki að hún hafi verið lögð fram af fulltrúum minnihlutans í sveitarstjórn, en kærandi er hvergi nafngreindur.

„Ég held að þetta hafi komið þeim jafnmikið á óvart og mér,“ segir hann. „Ég held að það verði mjög farsælt samstarf hjá okkur í sveitarstjórn.“