Balotelli klár í slaginn gegn Tottenham

Brendan Rodgers, knattspyrnustjóri Liverpool, sagði á blaðamannafundi í morgun að Mario Balotelli væri í klár í slaginn fyrir leikinn gegn Tottenham um helgina og þar gæti hann spilað sinn fyrsta leik fyrir félagið.

Balotelli gekk í raðir Liverpool frá AC Milan á mánudaginn, en Liverpool borgaði 16 milljónir punda fyrir framherjann sem áður hefur spilað í ensku úrvalsdeildinni með Manchester City.

Hann var í stúkunni á sínum gamla heimavelli á mánudagskvöldið þegar Liverpool tapaði, 3-1, fyrir Englandsmeisturum City, en nú er hann kominn af stað með Liverpool og er klár í leikinn á sunnudaginn.

„Hann verður klár fyrir helgina. Hann er búinn að spila þrisvar sinnum 45 mínútur á undirbúningstímabilinu og er því ekki í sínu besta formi, en hann lítur vel út,“ sagði Rodgers.

„Við erum búnir að skoða hann vel. Sjúkraliðið og íþróttafræðingarnir eru að vinna með hann og hann er í virkilega góðu standi. Hann getur spilað um helgina,“ sagði Brendan Rodgers.