Úthýst af leikskólum ef gjöld eru ógreidd

Það hefur gerst að börn missi leikskólapláss vegna vangoldinna leikskólagjalda bæði í Hafnarfirði og Reykjavík. Samkvæmt upplýsingum frá Reykjavíkurborg hafa um það bil sjö börn hætt í leikskóla á árunum 2012-14 í kjölfar verulegra vanskila. Fimm þeirra hófu leikskólavist að nýju þegar samið hafði verið um greiðslu. Innheimtureglur Reykjavíkurborgar kveða á um að leikskólaþjónustu skuli sagt upp þegar um veruleg vanskil er að ræða. Lendi foreldrar í vanskilum með leikskólagjöld er þeim bent á að tala við félagsráðgjafa á þjónustumiðstöðvum borgarinnar og þá frestast uppsögn til þess að hægt sé að vinna í málinu og leita lausna en fresturinn getur að hámarki verið þrír mánuðir. Ef foreldrar geta ekki greitt þá er lögð fram beiðni til afskriftarnefndar um að afskrifa vanskilin. Það er þá yfirleitt gert gegn því að viðkomandi skuldbindi sig til að standa við greiðslur áfallandi gjalda í að minnsta kosti sex mánuði. Hátt í tíu forsjáraðilar leikskólabarna hafa fengið slíka afskrift á þessu ári hjá Reykjavíkurborg.

Fulltrúar minnihlutaflokka í fræðsluráði Hafnarfjarðar lögðu fram fyrirspurn á fundi þess á mánudag þar sem spurt var um hvort einhver dæmi væru um það að börnum væri úthýst úr leikskólum bæjarins vegna vangoldinna leikskólagjalda. Einnig var spurt hvort einhverjum börnum hefði verið vísað af frístundaheimilum af sömu ástæðu.

„Við höfum dæmi um þetta og þess vegna erum við að leggja þetta fram. Þetta er tímaskekkja og við þurfum að taka okkur saman í andlitinu og gera eitthvað í þessu,“ segir Adda María Jóhannsdóttir, fulltrúi Samfylkingar í fræðsluráði Hafnarfjarðarbæjar.

Magnús Baldursson, fræðslustjóri Hafnarfjarðarbæjar, staðfestir að upp hafi komið dæmi þar sem barn hafi misst pláss af þessum ástæðum en það sé mjög sjaldgæft. „Þetta hefur gerst en er ekki algengt. Við miðum við þriggja mánaða skuld án þess að það sé samið um greiðslur.“ Hann segir alltaf reynt að semja um greiðslur skuldar áður en barnið missi plássið og dæmin séu ekki mörg. „Þetta er mjög sjaldgæft,“ segir Magnús.

Adda María segist hafa lagt fram fyrirspurnina vegna þess að hún hafi heyrt dæmi um það að leikskólabörn hafi misst pláss sitt á leikskóla vegna vangoldinna leikskólagjalda.

„Ég býst ekki við því að dæmin séu mörg en þetta á ekki að vera svona árið 2014. Þarna hljóta að vera einhverjar skýringar að baki og spurning hvort það sé eitthvert annað kerfi innan bæjarins sem eigi að taka á þessu svo það bitni ekki á börnunum. Nú ímyndar maður sér að þetta séu fjölskyldur sem eigi í fjárhagserfiðleikum og við erum með batterí til aðstoðar slíkum fjölskyldum. Við hljótum að þurfa að endurskoða eitthvað þessa verkferla,“ segir Adda María.