Brátt hægt að staðfesta umsókn

Þess er skammt að bíða að umsækjendur um niðurfærslu höfuðstóls húsnæðislána geti staðfest umsóknir sínar. Þetta segir Jóhannes Þór Skúlason, aðstoðarmaður forsætisráðherra.

Þegar aðgerðirnar voru kynntar í Hörpu þann 10. nóvember síðastliðinn kom fram að hægt yrði að staðfesta frá miðjum desember. Eftir staðfestingu skuldarans yrði svo höfuðstóllinn lækkaður. „Ég held að það mál standi bara nokkuð vel. Það er verið að klára að vinna í þessum tæknilegu atriðum,“ sagði Jóhannes Þór Skúlason við Fréttablaðið í gær. „Þó að nú sé kominn fimmtándi þá held ég að það verði ekki mikill dráttur á þessu,“ segir hann. Jóhannes segist þó ekki þora að fullyrða um tiltekna dagsetningu. „En ég held að innan fárra daga geti þetta verið komið í gagnið.“

Í kynningu á aðgerðunum kom fram að með beinu og óbeinu framlagi ríkisins væri öll verðbólga umfram 4% á árunum 2008-2009 leiðrétt til fulls.