Forsetinn gerir ráð fyrir þinglokum í dag

„Þingflokksformennirnir og forysta ríkisstjórnarinnar eru búin að ná utan um hvaða mál við viljum að verði afgreidd,“ segir Einar K. Guðfinnsson, forseti Alþingis. Einar býst við að þingstörfum ljúki í dag og þingmenn komist þannig í jólafrí.

„Það gæti verið raunhæft en hlutirnir verða þá að ganga upp og ekkert óvænt má koma upp á.“

Hann segir þó enn eftir að ljúka afgreiðslu á fjölmörgum málum. Alþingi afgreiddi í gær meðal annars umræðu og atkvæðagreiðslu um fjáraukalög 2014 og breytingar á virðisaukaskatti.

„Á morgun er gert ráð fyrir að við tökum til umræðu þriðju umræðu fjárlaga,“ segir Einar.

Helgi Hjörvar, þingflokksformaður Samfylkingarinnar, tekur undir að líklegt sé að hægt verði að klára þingstörfin á morgun.

„Nema þetta teygist fram á miðvikudag. Við höfum ekki gert neitt sérstakt samkomulag um þinglokin að þessu sinni, það ræðst bara af málunum sem eru á dagskrá, sem eru aðallega fjárlögin. Það fer bara eftir því hvernig dagskráin verður. Stærri mál, kvótinn eða ramminn eða eitthvað þannig bara liggur,“ segir Helgi.