Íhuga að geisla vatnið eftir bakteríumengun

„Það veit enginn hvers vegna mengunin barst í vatnsbólið,“ segir Ásgeir Eiríksson, bæjarstjóri Voga, um bakteríumengun sem uppgötvaðist í neysluvatni sveitarfélagsins í byrjun september.

Um var að ræða coli-gerlamengun sem kom fram við reglubundna skoðun heilbrigðiseftirlitsins í grunnskólanum í Vogum. Mengunin var rakin til vatnsbóls HS veitna í Vogavík. Í framhaldinu var íbúum ráðlagt að sjóða allt neysluvatn. Nokkrum dögum síðar hvarf mengunin og tilmælunum var þá fljótlega aflétt.

„Dagana á undan rigndi hressilega og líklegasta skýringin að mati heilbrigðiseftirlitsins er að jörðin hafi ekki haft undan að taka við vatninu og þá hafi húsdýraáburður eins og hrossatað blandast vatni sem síðan seig niður í grunnvatnið. En það er ekki nokkur einasta leið að finna út úr því,“ segir bæjarstjórinn.

Engum varð meint af mengaða vatninu í september. Ásgeir segir að núverandi borhola í vatnsbóli HS veitna í Vogavík hafi verið tekin í notkun árið 2008. Hann viti ekki til þess að viðlíka mengun hafi komið upp áður.

Samkvæmt aðalskipulagi Voga er gert ráð fyrir að nýtt vatnsból verði tekið í notkun eftir árið 2018. Í öryggisskyni verði það í heiðinni ofan Reykjanesbrautar en ekki niðri við sjó eins og núverandi borhola sem er í Vogavík á athafnasvæði fiskvinnslufyrirtækisins Stofnfisks.

Sveitarfélagið hefur óskað eftir því að framkvæmdum við nýtt vatnsból verði flýtt en HS veitur segja það ekki á dagskrá og ekki rúmast í fjárfestingaráætlun fyrirtækisins. Kostnaðurinn mun hlaupa á hundruðum milljóna króna.

Rætt er um að geisla vatnið í Vogavík í varúðarskyni áður en því er hleypt inn á veitukerfi sveitarfélagsins.

„Við höfum velt upp öllum flötum á málinu. Þetta er þá hugsað sem forvörn. Það sem einu sinni hefur gerst getur gerst aftur,“ segir Ásgeir. „Ef svo ólíklega vill til að það komi aftur upp bakteríumengun við dæluna þá myndi geislunin í raun og veru vinna á henni.“

Að sögn Ásgeirs er geislun þekkt aðferð sem notuð er annars staðar. „Þetta er ekki flókið ferli og hefur engin áhrif á vatnið en er fyrst og fremst varúðarráðstöfun.“