Fann kjötafganga í fjöru

Hjón á heilsubótargöngu gengu fram á kjötafganga í friðlandinu við Varmárósa í Mosfellsbæ. Ekki er vitað hver kom úrganginum fyrir í fjörunni.

„Við maðurinn minn vorum á göngu og tókum eftir óvenjumörgum fuglum á svæðinu. Er við könnuðum málið nánar þá kom það í ljós að einhver hafði skilið bein og lambakjötsafganga eftir á víðavangi,“ segir Ursula Jünemann sem gerði heilbrigðis- og umhverfisfulltrúa Mosfellsbæjar viðvart og voru hræin fjarlægð hið snarasta.

„Þessu hefur verið komið fyrir þarna yfir nótt því við gengum þarna daginn áður og þá var ekkert að sjá,“ bætti Ursula við.