Telur keppinaut kæra hótel til að tefja og kæfa samkeppni

„Eina ástæða kæranna er að koma í veg fyrir samkeppni og yfirgangur af hálfu aðila sem hefur fengið ríflegra byggingarmagn en þekkist á lóðum sínum til að mynda undir hótelbyggingu sína,“ segir Magnús Einarsson, aðaleigandi Þórunnartúns 4.

Eins og fram kom í Fréttablaðinu á föstudag hafa eigendur í Þórunnartúni 2 og Borgartúni 8 til 16 krafist stöðvunar framkvæmda við hótelbygginguna í Þórunnartúni 4 og að ógilt verði ákvörðun borgaryfirvalda um að leyfa þar viðbyggingu og 93 herbergja hótel. Þeirra eigin forsendur séu gerbreyttar „enda var ekki gert ráð fyrir að annað stórt hótel yrði reist í Þórunnartúni“.

Enginn nema keppinautur kærir

Magnús bendir á að á bak við kærurnar standi einn og sami maðurinn, Pétur Guðmundsson í Eykt, sem sjálfur sé að byggja risahótel við hliðina á Þórunnartúni 4 og áttatíu íbúða turn í sömu götu. Enginn ótengdur Pétri hafi gert athugasemdir.

„Pétur er einfaldlega að reyna að koma í veg fyrir samkeppni,“ segir Magnús. „Það er deginum ljósara að hann fær aldrei hnekkt skipulagi sem er miklu eldra en hans. Hann er búinn að valda okkur margra mánaða tjóni með sínum athugasemdum sem hann veit að munu aldrei leiða til þess að ekki megi byggja hótel. Þarna var samþykkt hótelbygging fyrir meira en tíu árum.“

Í umsögn lögmanns Þórunnartúns 4 ehf. til úrskurðarnefndar auðlindamála vegna fyrrnefndrar kæru er kröfunum um stöðvun framkvæmda og ógildingu byggingarleyfis harðlega mótmælt.

„Hrinda ber öllum slíkum tilburðum“

„Hagsmunir kærenda eru fyrst og fremst þeir að reyna að koma í veg fyrir að hótel rísi í nálægð við það hótel sem hann hefur sjálfur í byggingu. Það sjónarmið að koma í veg fyrir samkeppni er ekki málefnalegt og hrinda ber öllum slíkum tilburðum,“ segir í athugasemdum Þórunnartúns ehf.

Þá er meðal annars bent á að kærandinn, Höfðahótel, hafi sótt um að fá að byggja viðbótarhæð ofan á sína byggingu á sama tíma og hann lýsti áhyggjum af aukinni bílaumferð vegna Þórunnartúns 4. „Af þessum tvískinnungi kæranda verður það eitt ráðið að athugasemdir varðandi bílastæði og umferð eru að engu hafandi og settar fram af hans hálfu í þeim eina tilgangi að spilla fyrir eða hefta framgang verkefnis Þórunnartúns 4,“ segir í umsögn lögmanns Þórunnartúns 4 ehf.