Gafst upp á sorphirðufyrirtæki sem nær ekki í ruslið og fer með það sjálfur

„Það er með ólíkindum hversu mikið langlundargerð sveitarstjóri og stjórn Sorpstöðvar Rangárvallasýslu virðast hafa gagnvart síendurteknum brotum verktakans á verksamningi,“ segir Guðmundur Svavarsson á Fagrabakka í bréfi til Rangárþings eystra.

Í bréfinu rekur Guðmundur það sem hann segir vera ítrekaða vanrækslu sorphirðuverktakans Gámakó (Gámaþjónustunnar) á að uppfylla samninga við Sorpstöðina gagnvart heimili hans á Fagrabakka.

Fær borgað en nær ekki í ruslið

„Nú er staðan sú að sorphirðuverktaki hefur ekki fjarlægt sorp frá heimilu mínu síðan í byrjun júlí,“ segir Guðmundur í bréfi sínu og kveður þetta vera stöðuna þrátt fyrir yfirlýsingar sveitarstjórans, Ísólfs Gylfa Pálmasonar, um að sveitarfélagið vildi gera allt sem í þess valdi stæði til að koma málinu í lag.

„Sveitarfélagið innheimtir sorphirðugjöld af íbúum og greiðir sorphirðuverktaka athugasemdalaust fyrir þjónustu sem ekki er veitt. Því miður virðist frammistaða verktakans gagnvart heimilinu á Fagrabakka ekkert einsdæmi því undirrituðum er kunnugt um að víða í sveitarfélaginu eru sorphirðumál í ólagi, jafnvel við stofnanir sveitarfélagsins sjálfs,“ fullyrðir Guðmundur.

Lokað hlið ekki afsökun

Ísólfur Gylfi sveitarstjóri segir Guðmund hafa nokkuð til síns máls. Skýringin felist að hluta til í óskráðri reglu um að sorpbílar fari ekki um lokuð hlið svo verkið gangi greiðlega. Þetta telur Guðmundur misskilning.

„Ekkert í samningi verktaka eða útboðsgögnum segir að verktaka sé frjálst að bregðast skyldum sínum þurfi hann að opna hlið. Auk þess skal bent á að ítrekað hafa sorpílát ekki verið tæmd, jafnvel þótt hlið standi opið,“ segir ábúandinn á Fagrabakka. Hann er búinn að skila sorptunnunum og ekur sjálfur sínu sorpi á gámavöll á Hvolsvelli eins og hann stakk upp á að fyrirkomulagið yrði gegn því að hann þyrfti ekki að greiða sorphirðugjöld.

„Þessi lausn er millileikur en við ætlum að ræða við Gámaþjónustuna til að fá yfirsýn yfir framkvæmdina,“ segir Ísólfur Gylfi.

Tæma ekki horfnar tunnur

Elías Ólafsson hjá Gámaþjónustunni segir það hafa farist fyrir hjá afleysingamönnum að losa tunnur á Fagrabakka. „Var þá kvartað yfir því sem von var og báðumst við velvirðingar,“ segir Elías.

Eftir það hafi verið losað á Fagrabakka með eðlilegum hætti í nokkrar vikur. „Þá brá svo við að tunnurnar hurfu og tilkynnti starfsmaður okkar það til sveitarfélagsins. Síðan þá er okkur erfitt um vik að losa tunnurnar sem vonlegt er. Um leið og tunnurnar verða aftur settar á viðeigandi stað mun ekki standa á okkar starfsmönnum að losa þær,“ segir Elías Ólafsson.