Sullur í sláturlambi

Nýverið greindist vöðvasullur í sláturlambi hér á landi. Um er að ræða lirfustig bandorms (Taenia ovis), sem lifir í hundum og refum en smitast ekki í fólk. Sullurinn getur valdið óþægindum fyrir sauðfé og tjóni vegna skemmda á kjöti.

Í frétt Matvælastofnunar segir að fundurinn leiði hugann að öðrum og verri ormi sem tekist hefur að útrýma hér á landi (Echinococcus granulosus). Matvælastofnun hvetur fólk til að láta bandormahreinsa hundana sína reglulega og koma eins og kostur er í veg fyrir að þeir komist í hrátt kjöt og innyfli. Vöðvasullur greindist fyrst hér á landi árið 1983.

Á árunum fram að 1990 sást töluvert af þessum sulli en síðan hafa aðeins fundist stök tilfelli. Sullaveiki, sem var um aldir vel þekkt hér á landi, hefur ekki greinst í sauðfé síðan árið 1979, þökk sé fræðslu um smitleiðir og lögbundinni hundahreinsun. Greining vöðvasulls í sláturlambi, sem hefur sams konar lífsferil og sullaveikibandormurinn, gefur vísbendingu um lifandi bandorma í hundum eða refum og sýnir að ekki má sofna á verðinum, segir Matvælastofnun.