Draga þarf úr álagi á dýrin

Þegar varað er við háum gildum brennisteinsdíoxíðs (SO2) í lofti þurfa dýraeigendur að hafa í huga að mengunin hefur sambærileg áhrif á dýr og fólk. Matvælastofnun segir frá þessu á heimasíðu sinni.

Áhrifin eru þeim mun meiri því lengur sem dýrin verða fyrir menguninni. Dýraeigendur þurfa að draga sem mest úr álagi á dýrin þegar magn brennisteinsdíoxíðs í andrúmslofti er mikið, líkt og við hlaup, erfiða vinnu og streituvaldandi aðstæður.

Fylgjast þarf með dýrum á útigangi og hýsa þau ef vart verður við einkenni eins og roða í augum, hósta eða öndunarerfiðleika, eða hegðun sem bendir til að dýrin finni fyrir óþægindum.