Leiguskip látin sinna haustralli

Starfsmenn Hafrannsóknastofnunar harma þá stefnubreytingu sem orðin er í hafrannsóknum hér við land vegna bágrar fjárhagsstöðu stofnunarinnar. Bæði rannsóknaskip stofnunarinnar liggja bundin við bryggju á meðan haustralli er sinnt af leiguskipum og greitt fyrir með aflaheimildum.

Starfsmenn hafa áhyggjur af því að verið sé að skapa fordæmi þar sem leiguskip eru tekin fram yfir rannsóknaskip sem eru sérhönnuð til vísindarannsókna.

Þá telja starfsmenn Hafró að enginn sparnaður náist með þessu fyrirkomulagi. Andvirði aflamarks (786 þorskígildistonn) og afla sem ríkið lætur tveimur útgerðum í té er um 200 milljónir. Rekstrarkostnaður vegna úthalds rannsóknarskipanna til verksins er á hinn bóginn áætlaður um 25 milljónir króna.

Þetta kemur fram í ályktun starfsmannafélags Hafró. Lýsa starfsmenn yfir sérstökum áhyggjum af langvarandi niðurskurði til stofnunarinnar.