Ræða ábendingar landlæknis

Velferðarnefnd fundaði í gær um ábendingar landlæknis vegna eftirlits með lyfjaávísunum og lyfjanotkun. Fundurinn var haldinn í framhaldi fundar með Geir Gunnlaugssyni landlækni á mánudag.

Að sögn Sigríðar Ingibjargar Ingadóttur, formanns velferðarnefndar, var ákveðið að óska eftir því að fá fulltrúa ráðuneytisins á fund nefndarinnar á miðvikudag í næstu viku. „Þá munum við ræða viðbrögð þeirra við ábendingum landlæknis,“ segir Sigríður. Á mánudag afhenti landlæknir nefndinni bréf sitt til heilbrigðisráðherra um veikleika í kerfinu og hvað þurfi að gera til þess að hægt sé að sinna ávísun ávanabindandi lyfja betur. Til stóð að fara yfir málið í gær en því var frestað.

„Við tókum þá ákvörðun, þegar fólk sá að þetta væru umfangsmiklar ábendingar, að það væri ástæða til þess að ræða þetta við ráðuneytið,“ segir Sigríður.