Hótaði lögreglumönnum

Tuttugu og fjögurra ára gamall karlmaður er ákærður fyrir brot gegn valdstjórninni en honum er gefið að sök að hafa í ágúst 2013 ráðist á lögreglumenn með spörkum og höggum er hann var handtekinn í Austurstræti og seinna eftir flutning á lögreglustöðina við Hverfisgötu, sparkað í andlit lögreglumanna með þeim afleiðingum að þeir hlutu tognun á kjálka, áverka á handlegg og roða yfir kinnbeini.

Þá mun maðurinn hafa hótað lögreglu í október sama ár og hótað lögreglumanni líkamsmeiðingum er þeir voru í lögreglubíl en samkvæmt ákæru sagði maðurinn: „Ég sting þig með fokking sprautunál,“ og í kjölfarið: „Á ég að stinga þig?“

Maðurinn er einnig ákærður fyrir að hafa haft lítið eitt af amfetamíni í fórum sínum við ofangreind tækifæri.