Áttatíu metra hótelskip varpi ankeri varanlega í Hafnarfirði

„Númer eitt er þetta atvinnuskapandi í Hafnarfirði og kemur bænum á kortið,“ segir Magnús Garðarsson í Veitingalist sem sótt hefur um leyfi fyrir hótel- og veitingaskipi í Hafnarfjarðarhöfn.

Að sögn Magnúsar verður um að ræða 79 metra langt hótelskip með 62 herbergjum sem öll hafa eigið bað og bjarta glugga. Þar er 130 manna veitingstaður og bar og fundarherbergi. Fleyið er í „retro-stíl.“

Smíðað þegar nóg var til af peningum

„Skipið var smíðað í Búdapest í Ungverjalandi árið 1962 þegar það var nóg til af peningum og var ekkert til sparað. Það var allt tekið í gegn 2011 og við erum að láta breyta því enn meira og gera það að þriggja stjörnu hóteli áður en það kemur til landsins,“ segir Magnús.

Þrír frakkar um borð

Einn forsvarsmanna verkefnsins er Hafnfirðingurinn Úlfar Eysteinsson á veitingastaðnum Þremur frökkum. Úlfar mun sjá um rekstur veitingastaðarins um borð en Magnús segir enn eftir að ganga frá samningum um rekstur hótelhlutans. Ýmsir þættir séu enn ófrágengnir. „En skipið er væntanlegt hingað í júlí og á að verða tilbúið 1. september,“ segir hann.

Nokkrir staðir hafa verið ræddir fyrir skipið. Efst á listanum núna er að það verði bundið við flotbryggju út af svokölluðu Kirkjurtorgi.

Höfnin jákvæð en margt óskoðað

„Við höfum verið að skoða með jákvæðum huga hvort það er möguleiki að útbúa aðstöðu fyrir þetta,“ segir Már Sveinbjörnsson hafnarstjóri Hafnarfjarðarhafnar. Hótelskipið geti ekki verið við hefðbundna bryggju vegna mikils munar á flóði og fjöru. Lausnin gæti því verið flotbryggja. Tveir staðir komi nú helst til greina og þá helst framan við Kirkjurtorg þar sem auðvelt sé að tengja aðkomuna að gatnakerfinu og staðurinn gæti tengst nauðslegri stækkun aðstöðunna fyir smábáta í Flensborgarhöfn.

„Þetta er hugmynd sem hugsanlega gæti gengið en þarf að skoða miklu betur. Ef að af þessu yrði gæti það aldrei orðið fyrr en á næsta ári,“ segir hafnarstjórinn og minnir á að öllu skipulags- og hönnunarferli sé ólokið auk þess afla þurfi leyfa frá eftirlitsaðilum. „Það á eftir að skoða talsvert mikið ennþá áður en það verða teknar ákvarðanir.“