Aukin þjónusta við fatlað fólk

Strætó bs. hefur gert samning við sveitarfélögin á höfuðborgarsvæðinu um umsjón með Ferðaþjónustu fatlaðs fólks.

Þjónusta við fatlað fólk verður aukin frá áramótum, fyrst og fremst vegna hærri gæðakrafna varðandi bíla og búnað þeirra og styttri fyrirvara á pöntun. Akstur verður í boði á sama tíma og þjónusta strætisvagna en panta þarf ferðir með tveggja tíma fyrirvara.

„Við erum hæstánægð með þennan samning,“ segir Reynir Jónsson, framkvæmdastjóri Strætó bs., í tilkynningu. „Með honum verður þjónustan við þennan hóp stóraukin og verður tengdari okkar starfsemi.“

Smári Ólafsson, rekstrarstjóri ferðaþjónustu fatlaðs fólks, segir að nýr tölvubúnaður verði tekinn í gagnið fyrir þjónustuna sem geri notendum auðveldara að panta sér ferðir. „Með því getum við skipulagt ferðirnar betur og það næst betri nýting á bílana,“ segir hann. Kópavogsbær verður ekki aðili að samningnum fyrst um sinn.