Missir leyfi fyrir póstkassa jólasveinanna

Garðar Örn Úlfarsson skrifar 28. apríl 2014 07:00

Í miðri göngugötunni á Akureyri er póstkassi jólasveinanna að renna sitt skeið á enda eftir eins árs stöðuleyfi. Mynd/Úr einkasafni

„Það er talað um að sækja fram í alls konar ferðaþjónustu en þegar menn eru með góðar hugmyndir þá ganga þeir bara á veggi,“ segir Guðmundur R. Lúðvíksson, sem skikkaður hefur verið til að fjarlægja póstkassa jólasveinanna úr göngugötunni á Akureyri.

Guðmundur setti póstkassa jólasveinanna upp á göngugötunni fyrir ári. Viðlíka póstkassi er við Litlu jólabúðina á Laugavegi og kassi var einnig í stuttan tíma í Leifsstöð.

Ferðamenn opna sig í bréfum til íslensku jólasveinanna og fá kveðjur og gjafir til baka. Mynd/Úr einkasafni

Trúa jólasveinunum fyrir skilnuðum og ástarævintýrum

Póstkassarnir virka þannig að keypt eru sérstök kort á um 1.500 krónur sem fyllt eru út með nöfnum barna og óskum til jólasveinsins og síðan sett í póstkassana. Guðmundur segir sig og eiginkonu sína síðan svara hverju bréfi samviskulega og láta litla gjöf frá jólasveininum fylgja.

„Við fengum á þriðja þúsund bréf í fyrra. Að lesa þau er alveg ótrúlegt. Fólk hrósar landinu mikið og er að opna sig algerlega fyrir jólasveininum. Það segir frá ástarævintýrum og skilnuðum. Ein missti manninn sinn en ákvað samt að koma til Íslands og bað um bréf frá jólasveininum. Þetta er alveg magnað og hugmyndin var að geyma bréfin fyrir bók seinna meir,“ segir Guðmundur.

Guðmundur R. Lúðvíksson, eigandi póstkassa jólasveinanna, er vonsvikinn með skilningsleysi í stjórnsýslunni. Mynd/Úr einkasafni

Umsjón jólasveinakassans ábótavant

Skipulagsnefnd Akureyrar hefur nú hafnað ósk Guðmundar um áframhaldandi leyfi fyrir póstkassa jólasveinanna í göngugötunni. „Skipulagsnefnd telur frágangi og umsjón póstkassans ábótavant,“ segir í afgreiðslu nefndarinnar, sem gefur Guðmundi frest til 1. maí að fjarlægja kassann.

Guðmundur segir þetta koma sér spánskt fyrir sjónir. Hann hafi aldrei fengið athugasemdir um póstkassann. Eftir að hann frétti af synjunni hafi sonur hans, sem býr á Akureyri, kannað kassann.

„Það kom í ljós að það er ekkert óeðlilegt við kassan. Hann er pikk fastur, og það eina sem á honum sést er að það hefur verið aðeins krotað á hann á einum stað,“ segir Gyðmundur sem telur rökstuðning Akureyrarbæjar ekki standast.

„Við reyndum líka að fá leyfi frá Reykjavíkurborg til að vera með einn kassa en það var eins og að tala við karlinn í tunglinu. Það speglast í þessari afgreiðslu á Akureyri,“ segir Guðmundur sem kveður atvinnuveg geta falist í að svara bréfum til jólasveinsins. „Það er skemmtilegt að fólk geti sest niður og skrifað bréf til jólasveinsins og fengið svo kveðju og litla gjöf fyrir jólin kannski sjö mánuðum síðar.jólasveininum.“

Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.