Karlar gleymast oft í umræðu um jafnrétti

„Umræðan er miðuð að kjörum og hag kvenna og það er í sjálfu sér fyllilega réttlætanlegt að beina sjónum að því, en um leið gleymist það að karlar standa höllum fæti á margvíslegan hátt í samfélaginu,“ segir Helgi Gunnlaugsson, prófessor í félagsfræði við Háskóla Íslands.

„Karlar eru mun líklegri til að fremja sjálfsvíg, glíma við fíknivanda, lenda í fangelsi, fremja afbrot, lenda í slysum og ýmislegt fleira. Þetta vill oft gleymast í umræðu um jafnrétti kynja og menn taka þetta af einhverjum ástæðum ekki eins alvarlega og vandamál sem konur standa gjarnan frammi fyrir,“ segir Helgi.

„Þetta ætti að vera viðfangsefni jafnréttisbaráttu í meiri mæli en nú er gert,“ bætir hann við.

„Karlar sem standa höllum fæti í samfélaginu eru gleymdur hópur sem á sér engan málsvara,“ segir Helgi og spyr að lokum: „Er þetta gjald karlmennskunnar?“

Vilja að karlar hljóti þyngri refsingar

Í rannsókn sem Helgi Gunnlaugsson stóð að kom meðal annars í ljós að Íslendingar telja karla verðskulda töluvert þyngri dóma heldur en konur fyrir sömu afbrot.

„Við spurðum fólk að því hvað það vildi dæma aðila, sem hefði orðið uppvís að fíkniefnasmygli til landsins, til langrar fangelsisvistar. Breytan sem við skoðuðum var kyn brotamannsins. Tæpur helmingur vildi dæma í meira en þriggja ára fangelsi ef um var að ræða karl, en einungis þriðjungur ef um var að ræða konu. Þessar niðurstöður voru nokkuð sláandi,“ segir Helgi.

Hann segir niðurstöðurnar endurspegla undirliggjandi vandamál sem karlar standi frammi fyrir í samfélaginu og fái ekki hljómgrunn.