Tuttugu og sex flugferðum aflýst

Tuttugu og sex flugferðum Icelandair hefur verið aflýst vegna yfirvofandi verkfalls Félags íslenskra atvinnuflugmanna (FÍA) á morgun. Verkfallið stendur yfir í tólf klukkustundir, frá klukkan sex að morgni til klukkan sex að kvöldi.

„Þó svo viðræður standi yfir hjá sáttasemjara þá komust við ekki hjá því að grípa til þessara ráðstafana nú til að koma í veg fyrir það öngþveiti sem skapast mun á morgun verði ekki af samningum. Við biðjum viðskiptavini félagsins velvirðingar á þeirri miklu röskun sem verkfallið veldur og gerum allt sem í okkar valdi stendur þeim til aðstoðar," segir Guðjón Arngrímsson, upplýsingafulltrúi Icelandair.

Í tilkynningu frá Icelandair segir að ákvörðun um að fella niður flugin með þessum fyrirvara sé tekin til þess að eyða óvissu og gefa farþegum tækifæri á því að gera nauðsynlegar ráðstafanir.

Í heild eru um 4500 farþegar, mest erlendir ferðamenn, bókaðir í þær 26 flugferðir sem um er að ræða. Upplýsingum hefur verið komið til þeirra um stöðu mála, meðal annars með smáskilaboðum og tölvupósti. Mikið álag er á þjónustuveri félagsins og fólki því bent á vefsíðu þeirra, icelandair.is.

„Verkfall flugmanna veldur Icelandair miklum vonbrigðum, enda standa þeim til boða sambærilegar launahækkanir og aðrir í samfélaginu hafa samið um að undanförnu, þar á meðal meirihluti starfsmanna Icelandair Group,“ segir í tilkynningu Icelandair.

Þá segir að fyrirtækið muni eftir fremsta megni  reyna að leysa úr þeim vanda sem niðurfelling flugsins skapar viðskiptavinum. Það verði meðal annars gert með því að flytja farþega yfir á flug annarra flugfélaga.

Þeir sem hætta við ferð sína munu fá endurgreitt.

Búast má við seinkunum í flugi Icelandair á laugardagsmorgun og eru farþegar hvattir til að fylgjast með brottfarar- og komutímum flugvéla.