Bannað að sýna kvenmannsbrjóst á Jafnréttisdögum

„Við fengum leyfi til þess að hanna nýtt „lúkk“ á Ugluna frá Reiknistofnun Háskóla Íslands í tilefni Jafnréttisdaga. Uglan okkar myndi þá standa í einn dag, síðasta dag Jafnréttisdaga,“ segir Nína Hjálmarsdóttir, nemandi á sviðshöfundabraut Listaháskóla Íslands, en hún og samnemandi hennar Aníta Björk Jóhannsdóttir Randíardóttir, bjuggu til nýtt lógó á Ugluna, sameiginlegan vef háskólanema, með því að setja á hana eigin brjóst.

Þrír hópar af nemendum í kynjafræði í HÍ, í grafík og sviðshöfundabraut í LHÍ standa fyrir þremur viðburðum síðasta dag Jafnréttisdaga, sem er á morgun.

„Þetta fannst þeim of mikið. Við fengum sent bréf þess efnis að þá grunaði að þessi Ugla væri nóg til að særa einhverja notendur,“ heldur Nína áfram.

„Ég varð bara svo hissa. Eru brjóst særandi? Þetta hef ég aldrei upplifað eða heyrt fyrr.“

Eftir nánari eftirgrennslan stelpnanna fengu þær að heyra að það væri Reiknistofnun sem þyrfti að svara kvörtunum fólks og þess vegna væri ekki hægt að birta Ugluna á brjóstunum.

„Ég skil þetta ekki. Þetta er mjög saklaus ugla á brjóstunum. Hverja særir hún og hverjir eru það sem kvarta? Okkur var sagt að ef að þeir myndu leyfa brjóstin gæfi það fordæmisgildi. En Uglan á Októberfest var með bjór og Uglan á Gay Pride var í búningi – ef að þeir eru að reyna að höfða til skoðana allra þá finnst mér furðulegt að setja punktinn hér. Hvað er eiginlega svona hættulegt við brjóst?“

Nína bætir við að Uglan hafi verið hluti af verkefni sem þær unnu í áfanganum Kynjafræði og sviðslistir.

„Við fengum 10 fyrir listaverkið og viljum bara að fólk sjái ugluna okkar.“