Kröfur um miklar launahækkanir á ný samtök í sjávarútvegi

Formaður verkalýðsfélagsins Framsýnar á Húsavík telur að auðveldara verði að semja um kjör verkafólks eftir samneiningu Landssambands íslenskra útvegsmanna og Samtaka fiskvinnslustöðva í dag. Verkafólk þurfi að fá allt að 30 prósenta launahækkun í komandi kjarasamningum eftir áramót.

Stærstu samtök í sjávarútvegi á íslandi verða formlega sameinuð í dag þegar Landssamband islenskra útvegsmanna og Samtök fiskvinnslustöðva sameinast undir hatti Samtaka fyrirtækja í sjávarútvegi á Hilton Nordika hótelinu í dag. Jens Garðar Helgason er einn í framboði til formanns hinna nýju samtaka.

Sameinuð verða þessi hagsmunasamtök risi á íslenskum vinnumarkaði þar sem stærsti hluti fiskveiða annarra en smábáta og meira og minna öll fiskvinnsla í landinu sameinast.

Aðalsteinn Baldursson formaður verkalýðsfélagsins Framsýnar á Húsavík hefur lengi haldið því fram að sjávarútvegurinn geti borgað hærri laun, en kjarasamningar verða allir lausir með næsta vori. Sameining þessara samtaka sé rökrétt.

„En hins vegar hef ég auðvitað ákveðnar áhyggjur af þeirri stefnu sem hefur verið hjá LÍÚ sem felur í sér að sjómenn hafa verið samningslausir í nokkur ár. Þar vísa ég ábyrgðinni á LÍÚ og ég vona að svo verði ekki að ný samtök sjái ekki ástæðu til að semja við okkur,“ segir Aðalsteinn.

Aðalsteinn hefur á stundum ásamt öðrum verkalýðsleiðtogum mælt með því að verkalýðsfélög semji hvert fyrir sig við atvinnurekendur ekki hvað síst með þeim rökum að sjávarútvegurinn gangi vel og geti greitt hærri laun. En nú mælir hann með því að félögin mæti atvinnurekendum í samfloti og segir að miðað við þær hækkanir sem einstakir aðrir hópar hafi fengið eftir kjarasamninga á almennum markaði í fyrra þurfi að sækja miklar leiðréttingar á kjörum almenns verkafólks.

Ertu þá til í að segja að það þurfi að sækja 20 til 30 prósenta launahækkun á næsta samningstímabili?

Já alveg hiklaust. Ég bendi t.d. á að bílstjóri með mikla reynslu er með í dag 2220 til 230 þúsund krónur á mánuði. Þrjátíu prósenta launahækkun hjá honum þýddi að hann kæmist upp í tæpar 300 þúsund krónur og það eru ekki of mikil laun fyrir það starf. Þannig að ég segi það hiklaust, já,“ segir Aðalsteinn Baldursson og það verði krafan í komandi kjaraviðræðum.