213 fengið réttarstöðu sakbornings án þess að vera ákærðir

213 einstaklingar hafa fengið réttarstöðu sakbornings hjá embætti sérstaks saksóknara án þess að rannsókn viðkomandi máls hafi leitt til ákæru á hendur þeim.

Þetta kemur fram í svari dómsmálaráðherra við fyrirspurn Össurar Skarphéðinssonar um stöðu manna sem grunaðir eru um refsiverða háttsemi í skilningi 1. greinar laga um embætti sérstaks saksóknara.

Í svarinu kemur fram að 72 hafi nú réttarstöðu sakbornings hjá sérstökum saksóknara. Þar af eru 33 einstaklingar sem hafa réttarstöðu sakbornings í fleiri en einu máli.

Þá spurði Össur einnig um hversu lengi einstaklingarnir hafi haft réttarstöðu sakbornings. Má í svarinu sjá ítarlega úttekt á því en einn einstaklingur hefur haft réttarstöðu sakbornings í 63 mánuði. Það mál hefur verið til rannsóknar frá árinu 2009.