Leitin í Fljótshlíð: "Það er ekki fullleitað fyrr en manneskjan er fundin“

„Þetta er verkefni af þeirri stærðargráðu að þetta reynir á allan mannskapinn. Nú er reynt að létta á heimamönnum sem hafa staðið vaktina frá því að Ásta hvarf, eins og jörðin hefði gleypt hana,“ segir Guðbrandur Örn Arnarsson, frá Slysavarnarfélaginu Landsbjörg. Hann stjórnaði aðgerðum í Bleiksárgljúfri síðastliðna helgi.

Hann var í áhugaverðu og ítarlegu viðtali í Bítinu í morgun um leitina og aðstæður í Fljótshlíð. Viðtalið fylgir með fréttinni en ljóst er að mikið kapp er lagt á að finna Ástu Stefánsdóttur, sem ekkert hefur spurst til síðan um Hvítasunnuhelgina.  

Eftir 15 daga leit er mannskapur þreyttur og er nú hvíld þangað til næstu helgi. „Það var búið að fara mjög vel yfir leitarsvæðið,“ útskýrir hann en segir það ekki stórt. Einkum tvö svæði sem sveitin einbeitir sér að. „Gljúfrið sjálft, 200 metrar að lengd, það er það svæði sem við höfum áhuga á og annars vegar stór hringur sem markast af Markarfljótinu sjálf og Tindfjöllum,“ sagði Guðbrandur. „Það sem er verið að vinna í núna, það er búið að fara yfir gilið margoft. Kafa það, labba það, síga það. Leita bæði í efri hlutanum og neðri hlutanum.“

Þrátt fyrir að hafa leitað vel er verkinu ekki lokið. „Við tölum aldrei um að það sé búið að fullleita eitthvað því það er ekki fullleitað fyrr en manneskjan er fundin.“

„Það er einn stór foss sem við höfum sérstakan áhuga á þar sem við vitum að Pino og Ásta voru seinast. Það hefur ekki verið hægt að leita það eins vel og við hefðum viljað, bæði hættulegt og erfitt. Það er lítið skyggni í hyljum þar sem fossar eru að falla fram af.“

Í viðtalinu lýsir Guðbrandur ítarlega hvers konar verklagi björgunarsveitin hyggst beita um næstu helgi og þeim aðstæðum sem hópurinn þarf að vinna við.

„Þetta er náttúrulega gil sem er mjög  hátt, þar sem vinnusvæðið er þar er 30 metra lóðrétt fall beint niður og aðstæðurnar eru mjög þröngar.“