Brýnn lúxusvandi í Reykhólasveitinni

„Við erum fyrirtæki í örum vexti og okkur bráðvantar starfsfólk á Reykhólum en við fundum ekki húsnæði þar,“ segir Garðar Stefánsson, framkvæmdastjóri og annar stofnenda fyrirtækisins Norðursalts sem er með starfsstöð á Reykhólum.

Hann segir að nú þegar hafi fyrirtækið keypt gamalt hús á staðnum og gert það upp. Það dugir ekki til svo nú hefur fyrirtækið gert samning við gistiheimili fyrir vestan sem hýsir starfsmenn eina viku í senn.

„Við könnumst við þennan vanda,“ segir Finnur Árnason, framkvæmdastjóri Þörungaverksmiðjunnar á Reykhólum. „Reyndar búum við svo vel að hér starfar fólk sem hefur gert það lengi. En svo þurfum við að fá sumarafleysingafólk og það hefur nú alltaf bjargast.“

Þuríður Stefánsdóttir, hjúkrunarforstjóri á hjúkrunarheimilinu Barmahlíð, segir það staðreynd að erfitt sé að finna viðunandi húsnæði á svæðinu. Hún leitar nú logandi ljósi að starfsmanni og býr þó við það lán að geta boðið íbúð gegn vægri leigu.

Ingibjörg Birna Erlingsdóttir, sveitarstjóri Reykhólahrepps, segir að verið sé að ræða þessi mál með atvinnuveitendum á svæðinu. Hún segir það vissulega heppilegast að einkaaðilar fari út í að byggja en kostnaður við það sé hár svo menn sjái ekki í hendi sér að slík fjárfesting standi undir sér. En ef ekki dugi önnur ráð segir hún líklegast að sveitarfélagið taki það að sér.

Flestir viðmælendur Fréttablaðsins sögðu að húsnæðisskortur hefði varað nokkuð lengi.

Aðspurð hvað valdi uppganginum segir hún menn í nýsköpun vera að koma auga á tækifærin sem svæðið hafi upp á að bjóða. Það kemur heim og saman við tíðindin af Norðursalti sem hóf útflutning á salti í sumar en við vinnsluna er notast við vatn úr borholu og eins affallsvatn frá Þörungaverksmiðjunni. 

Einnig er gert ráð fyrir því í skipulagi sveitarfélagsins að heilsulind Vatnavina Vestfjarða rísi í náinni framtíð. Þaðan koma og kraftar sem reka Sjávarböðin á Reykhólum þar sem auðlindir sveitarinnar eru nýttar til heilsubótar og yndisauka.