„Vinstrisinnaðri meirihluti í Reykjavík en við höfum séð í langan tíma“

Hanna Birna Kristjánsdóttir, innanríkisráðherra, segir niðurstöður borgarstjórnarkosninganna í gær mikið áfall fyrir Jón Gnarr, sitjandi borgarstjóra. Þrátt fyrir að hafa verið talinn einn vinsælasti borgarstjóri seinni tíma, telur hún feril hans ekki farsælan því fæstir hafi litið á hann sem stjórnmálamann.

„Þetta er persónulegur sigur Dags B. Eggertssonar, fyrst og síðast, ekki sigur þessa meirihluta. Sannarlega ekki sigur stefnunnar sem þeir stóðu fyrir og nú erum við að horfa framan í það að við erum að fá fjögurra flokka meirihluta. Trúið mér, það verður vinstri sinnaðri meirihluti í Reykjavík en við höfum séð í langan tíma,“ sagði Hanna Birna, í viðtalsþættinum Eyjunni í kvöld.

Hanna Birna segir Jón Gnarr hafa fengið algjöra sérmeðferð, enginn hafi nálgast hann sem borgarstjóra því fyrst og fremst sé hann skemmtikraftur, lyftistöng í gleði. Hann hafi notið hvað minnst trausts flestra borgarstjóra. „Bíddu eftir tímann sem átti að vera svo ofboðslega farsæll og notalegur meirihluti,“ sagði Hanna Birna. 

Björt framtíð, áður Besti flokkurinn, fékk 15,6 prósent atkvæða í borgarstjórnarkosningunum í gær og náði inn tveimur borgarfulltrúum.

„Meirihlutinn féll. Það trúði því enginn fyrir  viku eða einum sólarhring að það gæti gerst. Flokkur borgarstjórans fer úr 35 prósenta fylgi í fimmtán prósent. Það hefðu nú verið talin tíðindi ef það hefði verið einhver annar borgarstjóri en þessi borgarstjóri,“ sagði Hanna Birna.

„Besti flokkurinn ætlaði nú einhvern veginn að vekja áhuga almennings á kosningum. Menn hafa aldrei síður farið til kosninga og núna.“

Sigmundur Davíð Gunnlaugsson forsætisráðherra tók undir orð Hönnu Birnu. Viðtalið í heild sinni má sjá hér að ofan.