Vilja afnema gömul orlofslög

„Þetta er náttúrlega bara löggjöf sem er komin vel til ára sinna og er úrelt. Og á þessum tímum þegar við erum að tala um jafnrétti þá þurfum við náttúrlega að átta okkur á því að það þarf að gilda í báðar áttir,“ segir Unnur Brá Konráðsdóttir, þingmaður Sjálfstæðisflokksins, í samtali við Fréttablaðið.

Fjórir þingmenn Sjálfstæðisflokksins hafa lagt fram frumvarp á þingi sem myndi fela í sér afnám húsmæðraorlofs á Íslandi. Auk Unnar Brár eru það Pétur Blöndal, Ragnheiður Ríkharðsdóttir og Vilhjálmur Árnason.

Lög um orlof húsmæðra á sér langa sögu frá þeim tíma þegar barnauppeldi og heimilisstörf voru að mestu leyti unnin af konum. Margar konur voru þá heimavinnandi og áttu þannig ekki rétt á orlofi frá vinnuveitendum sínum.

Í segir að Alþingi hafi fyrst sett lög um orlof húsmæðra árið 1960 og gildandi lög séu frá árinu 1972. „Lögin eru sett í þeim anda sem ríkti þá og miðast við þjóðfélag þess tíma. Sem betur fer hefur ýmislegt breyst til batnaðar, margt hefur áunnist í jafnréttisbaráttu og ljóst má vera að lögin eru í andstöðu við jafnréttissjónarmið. Það er því skylda Alþingis að afnema þau strax,“ segir í greinargerðinni.