Formaður SFR segir að erfitt sé að treysta ríkisstjórninni

SFR, stéttarfélag í almannaþágu, hefur hafið undirbúning næstu kjarasamninga. Flestir samningar félagsins eru lausir í apríl á næsta ári. Árni Stefán Jónsson, formaður félagsins, hefur heimsótt vinnustaði upp á síðkastið og hlustað á áherslur félagsmanna vegna komandi kjarasamninga. Árni telur að það séu erfiðir samningar framundan.

„Það er ljóst að við munum leggja ofuráherslu á jöfnun launa starfsmanna á opinberum markaði og þess almenna. Þá finnst mér einnig mikið áhyggjuefni að enn skuli mælast kynbundinn launamunur hjá ríkinu. Þann launamun viljum við einnig burt,“ segir Árni Stefán í tilkynningu frá SFR.

Hann býst ekki við að mögulegt verði að semja til lengri tíma því erfitt sé að treysta þeim stjórnvöldum sem nú séu við völd. Árni segist jafnvel búast við átökum. Þá gagnrýnir hann forgangsröðun ríkisstjórnarinnar þar sem litlir peningar séu í ríkiskassanum en hún ákveði engu að síður að ýta frá sér stórum tekjuöflunarleiðum, til dæmis með skattalækkunum.