Skilorðsbundið fangelsi fyrir að ráðast á nágranna sinn

Héraðsdómur Reykjaness hefur dæmt karlmann í 60 daga skilorðsbundið fangelsi fyrir að hafa ráðist á nágranna sinn í Vogunum í maí 2012.

Maðurinn var ákærður fyrir að hafa sest á bakið á nágranna sínum og rekið hnéð í bak hans, fyrir að hafa tekið um hendur hans, tekið í hálsmál nágrannans og hert að sem og að hafa dregið nágranna sinn á rassinum.

Dómurinn taldi ósannað að maðurinn hefði sest á bak nágranna síns og rekið hnéð í það. Þá var einnig talið ósannað að hann hafi tekið í hálsmál nágrannans og hert að því. Maðurinn var því sýknaður af þeim ákæruliðum.

Hann var hins vegar fundinn sekur um að hafa sest ofan á nágranna sinn þar sem sá lá á bakinu og tekið í hendur hans. Þá taldi dómurinn það einnig hafið yfir skynsamlegan vafa að maðurinn hefði dregið nágranna sinn á rassinum.

Maðurinn hafði ekki áður gerst sekur um refsiverða háttsemi. Hæfileg refsing var því metin 60 daga fangelsi sem er bundið skilorði í tvö ár. Þá var hann dæmdur til að greiða nágranna sínum 250.000 krónur í miskabætur.

Framburður mannanna og lýsingar á því sem átti sér stað þennan morgun var afar ólíkur og á tíðum kostulegur eins og fjallað var um á Vísi á sínum tíma. Þá frétt má sjá hér að neðan.