Mugison fær vegabréfahús á hjólum

Hafnarstjórinn á Ísafirði segir enga meinbugi á því að lána tónlistarmanninum Mugison, Erni Elíasi Guðmundssyni, hús á hjólum sem stendur á bryggjunni í bænum.

Hafnarstjórinn telur sig hins vegar ekki geta gefið leyfi fyrir því sjálfur að lána Mugison húsið þar sem tónlistarmaðurinn er sonur hans. Málið var því lagt fyrir bæjarráð.

Fram kemur að húsið hafi verið notað vegna vegabréfaskoðunar erlendra ferðamanna. Hafnarstjórinn segir ekkert koma í veg fyrir að lána húsið til afnota fram að sumri því höfnin þurfi ekki að nota það fyrr en skemmtiferðaskipin koma næst.

„Örn eða Mugison, eins og listamaðurinn kallar sig, hefur hugsað sér að koma sér upp vinnuaðstöðu, búa til tónlist í skúrnum,“ segir í erindi sem bæjarstjórinn lagði fyrir bæjarráð þar sem jákvætt var tekið í málið.