„Ég er ekki að setja vini eða fjölskyldu í hættu“

Gísli Rafn Ólafsson hjálparstarfsmaður segist hafa orðið fyrir mikilli gagnrýni vegna ákvörðunar sinnar að fara til Líberíu. Hann hefur nú dvalið þar í viku og leggur þar sitt af mörkum í baráttunni gegn ebólufaraldrinum sem þar nú geisar.  Hann segir gagnrýnina stafa af því að ekki er búið að koma á fót viðbragðsáætlun fyrir ebólu á Íslandi.

Í færslu sem hann birti á Facebook síðu sinni segir hann að hann muni ekki koma til Íslands fyrr en rúmum þremur vikum eftir að hann færi frá Líberíu. Einkenni geri oftast vart við sig átta dögum eftir smit, en lengsti tími þar til smit koma fram er 21 dagur.  Hann mun dvelja á sjúkrahúsi í Belgíu og verður í einangrun á meðan líklegasti tíminn til að smit komi fram er liðinn. Eftir það muni hann ferðast til Dubæ og Bandaríkjanna og takmarka á þeim tíma alla líkamlega snertingu við annað fólk. Hann kemur því ekki aftur til Íslands fyrr en upp úr miðjum nóvember.

„Ég er ekki að setja íslenska heilbrigðiskerfið á hausinn ef eitthvað kæmi upp. Ég er ekki að koma til Íslands í mánuð frá heimkomu frá Líberíu. Ég er ekki að setja vini eða fjölskyldu í hættu. Ég er að fara eftir fyrirmælum virtasta sóttvarnaraðila í heiminum. Ég er í sjálfskipaðri sóttkví í landi sem er tilbúið að taka á við ebólu. Ég er með aðgang að sérfræðilækni 24/7 til að fá faglega ráðgjöf. Ég tek meðvitaðar ákvarðanir um áhættu og hjálpa þeim sem eru í neyð,“ skrifar Gísli.

Hann segist hafa rætt við lækna hér á landi til að tryggja að hann hefði lyf og aldrei hefði komið upp í hans máli að banna honum að fara til Líberíu. 

„Því miður er það svo að þörfin hér úti er ansi mikil og að við sem stundum svona starf þurfum að geta tekið meðvitaðar ákvarðanir um það hvort áhættan við að fara hingað sé of mikil eða hvort hægt sé að vera með mótvægisaðgerðir sem gera þess ákvörðun réttlætanlega.“

Innlegg frá Gisli Rafn Olafsson.