24 verkefni fengu styrk frá Vinum Vatnajökuls

Í dag úthlutuðu Vinir Vatnajökuls tæplega 40 milljónum króna til styrktar 24 verkefnum sem snúa að rannsóknum, kynningu og fræðslu um Vatnajökulsþjóðgarð og nágrenni hans.

Styrkirnir voru afhentir í dag við hátíðlega athöfn á Hótel Natura. Vinir Vatnajökuls eru frjáls félagasamtök sem voru stofnuð árið 2009. Þau hafa nú á fimm árum veitt tæplega 250 milljónum króna í fræðsluverkefni og styrki.

„Það er mjög ánægjulegt að styrkja þessi fjölbreyttu verkefni sem umsækjendur hafa lagt mikla vinnu og metnað í. Þau eiga það sameiginlegt að stuðla að því að sem flestir geti notið þeirra náttúrufyrirbæra og þeirrar sögu sem Vatnajökulsþjóðgarður hefur að geyma,“ segir Kristbjörg Hjaltadóttir, framkvæmdastjóri Vina Vatnajökuls.