Húsvíkingar geta ekki sýnt steypireyðina í heilu lagi

 Beinagrind steypireyðarinnar sem rak á land á Skaga árið 2010, verður varðveitt á Hvalasafninu á Húsavík. Þetta sagði Sigmundur Davíð Gunnlaugsson forsætisráðherra á flokksráðsfundi Framsóknarflokksins á Hallormsstað um síðustu helgi. Hvalasafnið á Húsavík býr samt sem áður ekki yfir húsnæði til að sýna beinagrindina í heilu lagi. Hilmar Malmquist, forstöðumaður Náttúruminjasafns Íslands, segir ákvörðunina hafa komið sér í opna skjöldu.

„Ég heyrði af þessu í fjölmiðlum fyrst. Í síðustu viku var ég staddur á ráðstefnu og heyrði af þessari ráðstöfun þegar ég kom heim,“ segir Hilmar. Hann minnir á að samkvæmt ákvörðun ríkisstjórnar frá 2010 hafi varðveisla þessarar beinagrindar verið samvinnuverkefni margra aðila. „Að þessu máli komu umhverfisráðuneytið, menntamálaráðuneytið, Náttúrufræðistofnun Íslands og Náttúruminjasafn Íslands. Þetta hefur verið ákveðið samráðsferli og því kemur mér í opna skjöldu þessi ákvörðun forsætisráðherra. Framtíðarákvörðun um beinagrindina er á forræði þessara aðila og Náttúruminjasafnið er eitt höfuðsafna sem á auðvitað að vera með í ráðum.“

Aðstoðarmaður menntamálaráðherra. Sigríður Hallgrímsdóttir, staðfestir að ákvörðun um varðveislu beinagrindarinnar hafi verið tekin í góðri sátt; ákvörðunin hafi verið umhverfis- og menntamálaráðherra en forsætisráðherra verið falið að tilkynna um niðurstöðuna.

Hilmar bendir á að Hvalasafnið á Húsavík búi ekki yfir nægilegum húsakosti til þess að sýna beinagrindina í heilu lagi og mikilvægt sé að meðhöndla þennan grip af varfærni. „Það hefur ekki farið fram neitt faglegt mat á flutningi á svona dýrmætum grip. Þetta er mjög viðkvæmur gripur og sannkölluð gersemi sem verður að meðhöndla rétt. Hvalasafnið á Húsavík hefur ekki burði til þess að sýna gripinn í heilu lagi og því orkar þetta tvímælis,“ segir Hilmar.

Einar Gíslason, forstöðumaður Hvalasafnsins á Húsavík, heyrði, líkt og Hilmar, af þessari ákvörðun í fjölmiðlum. „Ég vissi ekki af þessari ákvörðun fyrr en í fjölmiðlum um helgina, hins vegar kemur hún ekki upp úr þurru þar sem við höfum lengi falast eftir grindinni norður á Húsavík,“ segir Einar. Hann staðfestir einnig að Hvalasafnið búi ekki yfir nægilega stóru sýningarrými til þess að sýna steypireyðina í heilu lagi. „Við búum ekki yfir nægilega stóru húsi til að setja grindina upp í heilu lagi en við munum leita að húsnæði. Við höfum hins vegar geymsluhúsnæði til að geyma gripinn.