Hlustar ekki á þau rök að ekki sé til fjármagn til að hækka laun

Árni Stefán Jónsson, formaður SFR, telur ríkisvaldinu ekki treystandi til að hugsa um launakjör starfsmanna sinna. Á meðan ríkisstjórnin hendi frá sér hverjum tekjumöguleikanum á fætur öðrum verði æ erfiðara fyrir SFR að hlusta á þau rök að ekki séu til peningar fyrir launahækkunum.

„Alltaf í þessari umræðu, þegar við eigum orðaskipti við ríkisvaldið, kemur upp í umræðunni að ríkið sé skuldugt, að hér hafi verið hrun fyrir nokkrum árum og að okkur er gert að skilja það að staða ríkisins sé ekki góð í því árferði. Oft er það látið fylgja að ríkið væri til í að gera betur en í því árferði sem nú ríki sé ekki svigrúm til frekari launahækkana. Það verður að segjast að það er ekki hægt að biðja okkur um þennan skilning þegar ríkið hendir frá sér tekjumöguleikum,“ segir Árni Stefán og bendir á að hægt sé að gera hlutina með öðrum hætti. „Þetta er spurning um forgangsröðun ríkisvaldsins og á meðan þessi forgangsröðun er viðhöfð munum við ekki taka því þegjandi og hljóðalaust.“

Guðlaugur Þór Þórðarson, varaformaður fjárlaganefndar, er ekki sammála Árna Stefáni og bendir á að ríkisstjórnin hafi skattlagt fjármálafyrirtæki sem fyrri ríkisstjórn hafi látið vera. „Ummæli Stefáns koma mér mjög á óvart. Núverandi ríkisstjórn er að ná í tekjur meðal annars með því að skattleggja fjármálafyrirtæki og slitastjórnir. Með þessum rökum má segja að síðasta ríkisstjórn hafi svo sannarlega kastað frá sér tekjumöguleikum.“

Guðlaugur vonar að menn horfi á málið í víðu samhengi og sjái að heildaráhrif skattbreytinga lækki að endingu skatta. „Það sem við erum að gera er að einfalda skattkerfið því það hefur margsýnt sig að einföld og hófleg skattheimta kemur öllum vel. Einnig hefur margoft verið bent á að heildaráhrif skattbreytinga skila sér í bættum hag íslenskra heimila með að létta álögum af fólkinu í landinu. Ég trúi ekki öðru en þeir sem gæta hagsmuna launþega líti fyrst á hag sinna launþega og fari ekki í einhverja flokkapólitík í þessum efnum,“ segir Guðlaugur Þór.

Árni Stefán telur fjárlagafrumvarpið einnig sem olíu á eldinn í erfiðum kjaraviðræðum í vetur. „Við sjáum ýmsa þætti í fjárlagafrumvarpinu og í gjörðum ríkisstjórnarinnar sem beinlínis skerða kjör okkar félagsmanna og munu gera málið erfitt.

Hækkun matarskattsins til dæmis hefur ekki góð áhrif á fólk sem og breytingar á menntaskólunum og aldurstakmörk. Meðal félagsmanna okkar eru sjúkraliðar og félagsliðar sem í mörgum tilvikum eru einstaklingar sem hafa farið seinna í nám en aðrir. Þessi vinnubrögð hleypa bara illu blóði í okkar fólk.“