Við ebólusmit hér á landi þyrfti að reisa vegg

Almannavarnadeild ríkislögreglustjóra barst rétt eftir hádegi í gær tilkynning um vél sem væri að lenda með veikan farþega sem talið var að gæti verið ebólusmitaður.

Að sögn Víðis Reynissonar, formanns almannavarnadeildar Ríkislögreglustjóra, þá hafði vélin fyrst fengið leyfi til að lenda með veikan farþega en rétt fyrir lendingu kom önnur tilkynning um að lækni um borð grunaði að sjúklingurinn væri ebólusmitaður.

Í kjölfarið var viðbragðsáætlun vegna ebólu sett í gang.

Þegar vélin lenti fór íslenskur læknir frá Heilbrigðisstofnun Suðurnesja um borð til þess að kanna ástand sjúklingsins en hann var ekki klæddur í hlífðarbúning.

„Hann gerði frumathugun til þess að kanna hvort um ebólusmit gæti verið að ræða. Sú athugun leiddi í ljós að honum fannst mjög ólíklegt að um ebólu væri að ræða.

Hann skoðaði sjúklinginn sem reyndist ekki vera með nein einkenni og hafði ekki verið á svæðum þar sem ebóla er útbreidd,“ segir hann en sjúklingurinn var að koma frá Suður-Afríku.

Víðir segir það hafa gengið vel að vinna eftir viðbragðsáætluninni og viðbúið hafi verið að fá tilkynningar vegna hugsanlegs smits.

„Við höfum verið að undirbúa okkur undir að fá svona tilkynningar um að einhvern um borð grunaði að það væri smit þannig að þetta kom okkur ekki á óvart,“ segir hann.

Ef um alvörusmit hefði verið að ræða þá segir Víðir að Landspítalinn hafi verið í stakk búinn til þess að taka við sjúklingnum. Hildur Helgadóttur, verkefnastjóri viðbragðsteymis vegna ebólu á Landspítala, tekur undir það. Á spítalanum hafi viðbragðs­teymið verið í startholunum ef um smit hefði verið að ræða.

„Við erum hluti af viðbragðsteymi Almannavarna en ekkert virkjaðist hjá okkur vegna þess að ekki reyndist vera um smit að ræða. Við vissum af þessu og vorum tilbúin,“ segir hún og tekur fram að fyrir helgi hafi verið gefin út ný viðbragðsáætlun. Þær ráðstafanir sem farið hafi verið í til að undirbúa spítalann undir möguleg ebólutilvik hafi öll verið tilbúin.

Þar að auki, ef kemur upp smit, þurfi að reisa vegg sem gert sé ráð fyrir að taki 2–6 klukkustundir og þá myndi sjúklingurinn bíða í sjúkrabíl á meðan nauðsynlegar ráðstafanir væru gerðar áður en hann kæmi inn í húsið.