Taktu umdeilda íslenskuprófið: Prófessor gefur lítið fyrir svör deildarstjóra

Eiríkur Rögnvaldsson, prófessor í íslensku, stendur fast á gagnrýni sinni á samræmdu prófi í íslensku sem nemendur í 10. bekk þreyttu í haust. Spurningar hafi verið illa orðaðar og sumt beinlínis rangt.

Eiríkur vakti máls á þessu á Fésbókarsíðu sinni í gær. Þar benti hann á að í prófinu þyrftu nemendur að eiga við hinar „klassísku gildruspurningar“ um hvaða föllum sagnirnar að langa og að hlakka stýri. Auk þeirra hafi fjöldi spurninga verið vægast sagt villandi og aðrar beinlínis rangar.

Máli sínu til staðfestingar nefnir Eiríkur spurninguna um hvert eftirtalinna fjögurra orða sé aðeins til í fleirtölu: andstæður, áhyggjur, ákærur og þrætur. Rétta svarið er áhyggjur, sem sé vissulega langoftast til í fleirtölu en einnig í eintölu eins og auðvelt sé að staðfesta með hjálp orðabókar.

Þá er hann ósáttur við spurninguna í hvaða falli stofn nafnorða finnist. Vissulega finnist stofn sterkra karlkynsorða í þolfalli eintölu en því fari fjarri að það sé algilt.

Sigurgrímur Skúlason, deildarstjóri innlendra prófa hjá Námsmatsstofnun, segir í hádegisfréttum RÚV að óheppilegt sé að spurt hafi verið um orð sem til er bæði í eintölu og fleirtölu á samræmdu prófi í íslensku en það hafi ekki þvælst fyrir nemendum 10 bekkjar.

Hins vegar hafi svör nemenda við fyrrgreindum spurningum komið vel út. Stundum hafi spurningum verið sleppt við yfirferð en í ár hafi ekki þótt ástæða til þess.

Eiríkur gefur lítið fyrir þessi svör. Forsendur spurninga verði að vera réttar.

„Það kom greinilega fram í máli talsmanns Námsmatsstofnunar að það skiptir í raun engu máli um hvað er spurt - aðalatriðið er að nemendur raðist rétt á normalkúrfuna.“

Sigurgrímur segir að með prófinu sé ætlað að reyna á máltilfinningu og hvort emendur átti sig á tungumálinu frekar en tæknileg atriði svo sem beygingar og reglur.

„Mér finnst nú meðfylgjandi spurningar einmitt vera um tæknileg atriði en ekki koma máltilfinningu nokkurn skapaðan hlut við. En svo geta menn líka skoðað prófið í heild,“ segir Eiríkur.

Töluverð umræða hefur verið um samræmdu prófin undanfarnar vikur. Kennarar á Norðurlandi vestra ályktuðu nýlega að enskuprófið hefði verið of þungt.

Lesendur Vísis geta kynnt sér prófið í íslensku hér að neðan. Þá má skoða prófið í ensku í viðeigandi frétt fyrir neðan þessa frétt.