Þriðjungur segist styðja ríkisstjórnina

Um 30 prósent styðja ríkisstjórnina, samkvæmt niðurstöðum skoðanakönnunar Fréttablaðsins. 55 prósent segjast ekki styðja hana, tólf prósent segjast óákveðin og þrjú prósent svara ekki spurningunni.

Þegar einungis eru skoðuð svör þeirra sem taka afstöðu segjast 35 prósent styðja ríkisstjórnina. Sextíu og fimm prósent segjast ekki styðja hana.

Magnús Júlíusson, formaður Sambands ungra sjálfstæðismanna, segir að þessar tölur komi sér ekki á óvart í ljósi þess hve mikil umræða hefur verið um breytingar á virðisaukaskattskerfinu. „Umræðan hefur verið mjög á einn veg. Hún hefur verið einfölduð mjög og eitt atriði tekið fyrir,“ segir Magnús og vísar þar í umræðu um hækkun skatta á matvæli.

„Þetta er í sjálfu sér erfitt mál, á meðan kynningin er í eina áttina þá eðlilega kemur það niður á fylgi við ríkisstjórnina,“ segir hann. Það sé hins vegar áhugavert að umræðan hafi ekki komið niður á fylgi Sjálfstæðisflokksins. Magnús bendir á að flokkurinn mælist sterkur og segist telja að það sé að miklu leyti vegna sterkrar forystu hans.

Magnús segir að þingmenn Sjálfstæðisflokksins þurfi að vera miklu duglegri að kynna fyrir þingi og þjóð hver heildaráhrif af virðisaukaskattsfrumvarpinu séu.

Breytingin geti þýtt kaupmáttaraukningu upp á 0,4% fyrir heimilin. „Það er stóra málið og það virðist ekki ná að komast inn í umræðuna,“ segir Magnús.



Helgi Haukur Hauksson, formaður Sambands ungra framsóknarmanna, segir mikilvægt að menn átti sig á þeim gífurlega mikilvægu verkefnum sem verið er að vinna að. Það sé líka ljóst að hækkun virðisaukaskatts á matvæli sé ekki líkleg til vinsælda fyrir ríkisstjórnina.



Helgi Haukur segir að ríkisstjórnin sé að fást við vandasöm verkefni, Verið sé að vinna í því að leysa skuldavanda heimilanna með leiðréttingunni.

„Það er heldur ekki auðvelt að glíma við ríkisfjármálin þegar nettóvaxtagjöld ríkissjóðs voru til að mynda á síðasta ári 70-80 milljarðar,“ segir Helgi Haukur. Það sé aldrei til vinsælda fallið að skera niður.



Könnun Fréttablaðsins á stuðningi við ríkisstjórnina var gerð dagana 21. og 22. október. Hringt var í 1.241 mann þangað til náðist í 801, en 85 prósent tóku afstöðu til spurningarinnar. Úrtakið er lagskipt slembiúrtak.